Ekokardiografia është një ekzaminim i zemrës që bazohet në përdorimin e ultratingujve. Ajo bën të mundur vlerësimin e funksionit të zemrës (funksionin pompë, funksionimin e valvulave të zemrës) dhe madhësinë e zemrës, për të zbuluar sëmundje të mundshme të saj. Në shumicën e rasteve ekokardiografia kryhet nga jashtë; në disa raste, ajo kryhet nga brenda, nëpërmjet ezofagut, si një gastroskopi (ekokardiografia transezofageale). Meqë ekografia është një ekzaminim pa rrezik dhe pa rrezatim, ekokardiografia është një ekzaminim që kryhet shumë shpesh në rastet kur dyshohen sëmundje të zemrës.
Ekokardiografia e jashtme dhe ekokardiografia transezofageale janë ekzaminime të kardiologjisë, një degë e mjekësisë interne (të organeve të brendshme).
A kërkon ky ekzaminim ndonjë përgatitje paraprake specifike?
Ekokardiografia mund të kryhet pa përgatitje specifike.
Çfarë duhet të sqarohet përpara ekzaminimit?
Përpara kryerjes së ekografisë nuk nevojitet asnjë sqarim.
Si realizohet ekokardiografia?
Për ekokardiografinë tradicionale të jashtme aplikohet xheli i kontaktit në lëkurë, më pas koka e sondës së ultratingullit vendoset mbi lëkurë. Specialisti lëviz kokën e sondës duke bërë lëvizje para-prapa, në mënyrë që të mund të shohë imazhin e dëshiruar në monitor, dhe kështu të vlerësojë nëse zemra ka anomali. Përveç kësaj, është gjithashtu i mundur edhe vlerësimi i fluksit të gjakut me pajisjen ekografike me Dopler, i cili siguron informacion shtesë për praninë e sëmundjeve.
Për ekokardiografinë transezofageale, ashtu si edhe për gastroskopinë, sonda futet nga goja në ezofag. Ky ekzaminim lejon një imazh më të saktë të zemrës, dhe mbi të gjitha, të valvulave të zemrës, për shkak se koka e sondës është më afër zemrës sesa në rastin e ekokardiografisë së jashtme.
Kur duhet të kryhet Ekokardiografia?
Ekzaminimi kryhet në raste të simptomave të lidhura me zemrën, për diagnozën dhe kontrollin e mjekimit të sëmundjeve të zemrës.
Arsyet më të shpeshta për ekokardiografi janë:
- Insufiçienca e zemrës (dobësimi i punës së zemrës)
- Infarkti i miokardit
- Çrregullimet e ritmit të zemrës
- Keqformimet e zemrës
- Sëmundjet e valvulave të zemrës
A paraqet Ekokardiografia ndonjë rrezik apo efekte të padëshiruara?
Ekokardiografia e jashtme është pa dhimbje dhe pa rreziqe. Gjatë ekokardiografisë transezofageale, në raste shumë të rralla mund të ndodhin dëmtime të gojës ose ezofagut. Gjithashtu, në raste të rralla mund të shkaktohen probleme me frymëshkëmbimin ose çrregullime të ritmit të zemrës.
Dëshironi të konsultoheni me një kardiolog kliko ketu
Ky informacion nuk do të zëvendsojë këshillen e një doktori. Lista doktorëve është dhënë si një lehtësi për ju. Ajo nuk është menduar si një rekomandim. doktorijuaj.com hedhë poshtë çdo garanci ose detyrim për përdorimin tuaj të këtij informacioni, pa konsultimin e drejtëpërdrejte me doktorin. Përdorimi i këtij informacioni do të thotë se ju pranoni kushtet e përdorimit. Se si u zhvillua ky informacion për t'ju ndihmuar që të merrni vendime më të mira shëndetësore.
